කාන්තාවන් සදහා බස් සහ දුම්රිය සේවා නොමිලේ සැපයීමට මහ ඇමතිගෙන් තීන්දුවක්..

0
158

ඉන්දියාවේ දිල්ලිහි ප්‍රධාන අමාත්‍යවරයා ලෙස කටයුතු කරන අර්වින්ද් කෙජ්රිවාල් මහතා දිල්ලි පාලන ප්‍රදේශය තුළ කාන්තාවන්ට නොමිලේ පොදු ප්‍රවාහන සේවාවන් ලබාදීමට පියවර ගැනීමට තීරණය කර තිබේ.

ප්‍රධාන ඇමතිවරයා පවසන්නේ බස් රථවල සහ මෙට්‍රෝ දුම්රියවල නොමිලේ ගමන් කිරීමට අවස්ථාව සැලසීමෙන් දිල්ලි නගරයේ කාන්තාවන්ගේ ආරක්ෂාව වර්ධනය වනු ඇති බවය.

දිල්ලි යනු ඉන්දියාවේ ස්ත්‍රී දූෂණ වැඩි ම සංඛ්‍යාවක් වාර්තා වන නගර අතරින් එකකි. 2012 වසරේදී බස් රථයක් තුළදී සිසුවියක සමූහ දූෂණයකට ලක් කර ඇය ඝාතනය කරනු ලැබීමත් සමග දැවැන්ත උද්ඝෝෂණ ආරම්භ විය. කෙසේ වෙතත්, කාන්තාවන්ගේ ආරක්ෂාව තහවුරු කිරීමට කෙජ්රිවාල් ඉදිරිපත් කරන යෝජනාව උපකාර වනු ඇත්දැයි යන්න ඇතැමුන්ට ඒත්තු ගැන්වී නොමැත. කෙසේ වෙතත්, එම තීරණයට දිල්ලි වැසියන්ගෙන් සාර්ථක ප්‍රතිචාරයක් ලැබී නැතැයි දේශපාලන විචාරකයෝ පෙන්වා දෙති.

දිල්ලි නගරයේ පිහිටි ඉන්දීය තාක්ෂණ ආයතනයේ සේවය කරන ප්‍රවාහන විශේෂඥයෙකු වන දිනේෂ් මෝහන් බීබීසී පුවත් සේවයට පැවසුවේ, නොමිලේ පොදු ප්‍රවාහන සේවා සැපයීමෙන් ගැටලුවට විසඳුමක් නොලැබෙන බවය.

Women to ride for free on public transport in Delhi

“මෙට්‍රෝ එකේදි විතරක් ආරක්ෂා වෙලා වැඩක් නෑ. කාන්තාවන් යන එන හැම තැනකදි ම ආරක්ෂාව ගැන හිතන්න ඕන. පාරේ ඇවිදගෙන යන එක කොයිතරම් ආරක්ෂිත කියලා හොයලා බලන්න ඕන. මෙට්‍රෝ දුම්රියපොළට එන අතරතුර ආරක්ෂාව ගැන සිතන්න ඕන. මේ යෝජනාවේ අරමුණ ආරක්ෂාව නම් ඒක හැම පැත්තකින් ම තහවුරු වෙන්න ඕන. ආරක්ෂාව මෙට්‍රෝ දුම්රියපොළෙන් ආරම්භ වෙලා එතනින් අවසන් විය යුතු නැහැ. මම හිතන්නේ නැහැ මේ යෝජනාවෙන් ඒවා ගැන හිතලා තියෙනවා කියලා.”

දිල්ලි මෙට්‍රෝ දුම්රිය සේවාවේ සියලු දුම්රියවල ධාවනය වන දිශාවේ ඇති පළමු මැදිරිය දැනටමත් කාන්තාවන්ට පමණක් වෙන් කර තිබේ.

අදාළ යෝජනාව සම්බන්ධයෙන් සමාජ මාධ්‍යවල ද දැඩි කතාබහට ලක් වේ. ආර්ථික විද්‍යාඥයින්, මාධ්‍යවේදීන් ඇතුළු විශාල පිරිසක් අදාළ යෝජනාව ප්‍රතික්ෂේප කර ඇති අතර, ඇතැම් කාන්තාවන් පවසන්නේ, ඔවුන් පොදු ප්‍රවාහන සේවා වෙනුවෙන් තවදුරටත් මුදල් ගෙවන බවය. කෙසේ වෙතත්, මෙම යෝජනාවට පක්ෂව අදහස් පළ කරන්නෝ ද වෙති.

කෙජ්රිවාල් සිය යෝජනාව නිවේදනය කළ ද, එය සැබවින් ම ක්‍රියාත්මක වන තුරු බලා සිටීමට කාන්තාවන්ට සිදුවනු ඇත. පළාත් ආණ්ඩුව මෙන්ම ඉන්දීය මධ්‍යම ආණ්ඩුව ද දිල්ලි මෙට්‍රෝ දුම්රිය සංස්ථාවේ සම කොටස්කරුවෙකු වන බැවින් අදාළ යෝජනාවට මධ්‍යම රජයේ අනුමැතිය අවශ්‍ය වේ. එහෙත්, කෙජ්රිවාල් පවසා ඇත්තේ, මීට අදාළ වියදම් පළාත් ආණ්ඩුව විසින් ගෙවනු ලබන හෙයින් මධ්‍යම ආණ්ඩුවේ අනුමැතියක් අත්‍යවශ්‍ය නොවන බවය.

දිල්ලි පළාත් ආණ්ඩුවේ ප්‍රවාහන අමාත්‍ය කයිලාෂ් ගාලොට් ද පැවසුවේ, මේ සඳහා කිසිදු අනුමැතියක් අවශ්‍ය නොවන බවය. ඇතැම් පිරිස් චෝදනා කරන්නේ, මෙය කෙජ්රිවාල්ගේ පූර්ව මැතිවරණ උපක්‍රමයක් බවය. දිල්ලි පාලන ප්‍රදේශයේ මැතිවරණය ලබන වසරේදී පැවැත්වීමට නියමිතය. දිල්ලි මෙට්‍රෝ දුම්රිය සංස්ථාව මෙතෙක් මේ සම්බන්ධයෙන් නිල ප්‍රතිචාරයක් දක්වා නොමැත. එහෙත්, එම ආයතනයේ නියෝජිතයෙකු උපුටා දක්වන ‘ටයිම්ස් ඔෆ් ඉන්ඩියා’ පුවත්පත වාර්තා කළේ, එම යෝජනාව සම්මත වුවහොත් එය ක්‍රියාත්මක කිරීම “දුෂ්කර” වනු ඇති බවය.

දිල්ලිහි ගෘහ නිර්මාණ ශිල්පිනියක සහ නගර සැලසුම් ශිල්පිනියක වන සෝනල් ෂා ට්විටර් පණිවුඩයක් පළ කරමින් පවසා ඇත්තේ, කාන්තාවන්ගේ ආරක්ෂාව සම්බන්ධයෙන් ඵලදායී පියවරක් ගැනීම සඳහා කරුණු රැසක් පිළිබඳව අවධානය යොමු කළ යුතු බවය. පොදු ප්‍රවාහන සේවයේ දැනටමත් පවතින ගැටලු රැසකට විසඳුම් ලබා දීමට පළමුවෙන් පියවර ගත යුතු බව ඇය පෙන්වා දී තිබේ.

– උපුටා ගැනීම BBC සිංහල

Facebook Comments

LEAVE A REPLY

Please enter your comment!
Please enter your name here